Vieiros

Ocorreu nunha rexión paquistaní fronteiriza con Afganistán. Segundo os responsábeis de seguridade daquel país, un mísil de orixe estadounidense foi o causante da morte de 10 persoas. Até o de agora e dende setembro rexistráronse case 20 ataques deste tipo, porén este é o primeiro despois da celebración dos comicios electorais. Ao parecer, o proxectil dirixíase a Waziristán, zona convertida nun santuario de Al Qaeda e os talibáns na fronteira.

Da súa banda, Paquistán asegura que os ataques non só violan a súa soberanía, senón que mesmo son contraproducentes no seu intento de loitar contra os integristas autores da violencia tanto no seu país como en Afganistán. Ademais, o goberno paquistaní, aliado dos EUA, di que estas acometidas prexudican a súa campaña para poñer a opinión pública da súa parte. Mentres, os Estados Unidos quitáronlle ferro ao asunto, sostendo que os ataques son necesarios para protexer as tropas estadounidenses en Afganistán e matar aos talibáns membros de Al Qaeda que as ameazan.