Vieiros

Despois duns días turbulentos á volta do partido da irmandiña, que obrigaron a esquecer os compromisos con Chile e Euskadi, á fin parece aclararse a resolución do conflito. Angola é o rival con máis posibilidades de enfrontarse aos combinados masculino e feminino.

Euskadi... ou Euskal Herría
A Federación Vasca de Fútbol cancelou os seus compromisos con Galiza e Irán por mor dun problema cos seus xogadores no referido á nomenclatura do equipo. Mentres os futbolistas querían manter o nome de Euskal Herria utilizado o ano pasado, a federación decidiu recuperar a denominación Euskadi coa que foron coñecidos nos anos anteriores. Ningunha das dúas partes cedeu e o resultado final foi a suspensión dos dous partidos.

Chile non cumpriu o acordo firmado
O problema co rival dos irmandiños foi diferente, xa que o seleccionado chileno non estaba en condicións de cumprir o acordo firmado coa federación mediante a axencia de márketig Media Sports Marketing. Os problemas internos entre a Asociación Nacional de Fútbol Profesional de Chile e o sindicato de xogadores fixeron imposíbel que Chile puidera presentar o día 27 un equipo acorde co pactado anteriormente con Media Sports.