Vieiros

Esta quinta feira inaugurouse na rede a Biblioteca Digital Camões, coa que se poderá ler, por exemplo, Os Lusíadas, a través do eReader, iPod Notes, Plucker, Mobipocket ou mesmo no teléfono móbil.

O obxectivo desta iniciativa é dispoñibilizar online á comunidade lusófona -formada por perto de 220 millóns de persoas en todo o mundo- documentos dixitalizados, dende textos literarios e partituras musicais a ensaios e estudos científicos. O acesso a estes contidos é de balde e resulta da modernización e unión desta biblioteca co Centro Virtual Camões, consideradas ámbalas dúas como "ferramentas estratégicas para o ensino e aprendizagem do português no estrangeiro, bem como para a divulgação da língua e cultura portuguesas no mundo" polo coordinador do centro virtual, Rui Vaz.

Con esta nova web, os últimos cinco séculos de literatura, ciencia, música... da cultura portuguesa quedan a un só clic. A iniciativa está aberta, ademais, á participación de institucións públicas ou privadas, e foi desenvolvida por investigadores e estudantes que se atopan, sobre todo, fóra de Portugal. A idea, segundo explicou a presidenta do Instituto Camões, Simonetta Luz Afonso, naceu cando un internauta en Siberia conectouse na web da institución preguntando por alguén que quixese falar con el durante unha hora ao día, para axudarlle a aprender portugués.