Vieiros

Vieiros de meu Perfil


Fwwwrando

RSS de Fwwwrando
"Gran potencial de desenvolvemento"

Portugal e Galiza apostan pola colaboración conxunta en innovación tecnolóxica

Asinado un acordo entre o Coimbra Inovação Parque e o Parque Tecnolóxico de Galiza para se proxectaren a nivel internacional.

Redacción - 14:25 13/01/2009

O Coimbra Inovação Parque (iParque) e o Parque Tecnolóxico de Galiza (Tecnópole) asinaron un acordo de colaboración este luns na Reitoría da Universidade da cidade portuguesa, que ten por obxectivo a proxección conxunta internacionalmente na área de innovación tecnolóxica.

"O obxectivo é crear alianzas estratéxicas que axuden na internacionalización das empresas, facer intercambios, explorar nichos de mercado novos en países da UE e non só. Aliados, podemos penetrar noutros países", afirmou Salustiano Mato, director xeral de Investigación, Desenvolvemento e Innovación da Consellaría de Industria.

O presidente do iParque, Norberto Pires sinalou: "Aprender cos outros é unha forma de ser intelixente. Ao estabelecer redes, ofrecemos ás nosas empresas oportunidade de se internacionalizaren moito máis facilmente. E tamén queremos gañar escala". Pires salientou ademais que na Galiza hai unha "identificación cultural" con Portugal.

Ademais da Xunta, participan no proxecto a Câmara Municipal de Coimbra e a Comissão de Coordenação e Desenvolvimento Regional do Centro (CCDRC) de Portugal, coa promoción de iniciativas dinamizadoras da industria a través de actuacións vinculadas co emprendemento, a innovación e a tecnoloxía.


5/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: