Vieiros

Dende este domingo, Islandia conta con nova primeira ministra. A até agora ministra de Asuntos Sociais e Seguridade Social, a socialdemócrata Jóhanna Sigurðardóttir, encabezará o goberno islandés, despois de pactar un goberno de coalición co Movemento de Esquerda Verde (Vinstrihreyfingin-grænt framboð).

A Alianza Socialdemócrata (Samfylkingin, con 18 escanos) da que forma parte Sigurðardóttir chegou a un complicado acordo o sábado cos verdes (9 escanos) para formar un goberno en minoría até as eleccións do 9 de maio. O novo executivo formouse a consecuencia da dimisión do gabinete do anterior primeiro ministro, o conservador Geir Haarde, por mor da presión popular provocada pola crise financeira que lle afectou especialmente a Islandia.

A nova xefa de goberno anunciou que a súa principal tarefa será buscarlle solucións á crise. O líder da Esquerda Verde, Steingrímur Sigfússon, asumirá o ministerio de Finanzas. Sigurðardóttir ten 66 anos e é a primeira xefa de goberno declarada homosexual. Ex-azafata e sindicalista, casada cunha xornalista e nai de dous fillos adultos, caracterizouse na carreira política pola súa defensa da familia e das minorías.