Vieiros

Cumpríronse os prognósticos no campionato estatal sub-23 de squash celebrado durante esta fin de semana nas instalacións de Balaidos e Xisela Aranda asoballou ás súas rivais, gañando por tres sets a cero todos os partidos que xogou. O torneo tivo unha gran acollida entre o público vigués que encheu o recinto para presenciar as finais. A gran noticia é que as xogadoras galegas ocuparon os cinco primeiros postos, e detrás de Aranda estiveron Ana Arousa, Carla Fernández, Ruth Camino e Sara Esperón. Aranda venceu na final á pontevedresa Ana Arousa, que deixou fóra da final á segunda favorita, Ruth Camino.

Malia as boas sensacións que Arousa deixou nas semifinais non puido facer nada na final contra Xisela Aranda, que acada así o seu terceiro título consecutivo de campioa sub-23. Aranda venceu todos os seus partidos por tres goles a cero, e confesou que o torneo resultou "máis sinxelo do que ela agardaba" mais atribuíu isto ao duro traballo que leva facendo para preparar os campionatos estatal e europeo. No squash feminino Galiza é a gran potencia estatal do futuro, e outro dato que ilustra con claridade esta realidade é o feito de que sete das 10 primeiras clasificadas son xogadoras galegas.

Carlos Cornes foi o mellor en homes
Na categoría masculina a vitoria final foi para Eduardo González, que se impuxo por tres sets a un a Diego López. O mellor galego foi Carlos Cornes, que chegaba como terceiro favorito e rematou na cuarta posición.