Vieiros

Vieiros de meu Perfil


Edición xeral

RSS de Edición xeral
Outra fenda entre PSOE e BNG

Nigrán: entre a "refundación" e a ruptura do pacto de goberno

O alcalde socialista nega a ocultación do borrador do PXOM, tal e como lle acusan desde o Bloque.

Redacción - 09:45 12/03/2009

Nun comunicado enviado aos medios de comunicación, o rexedor de Nigrán, Efrén Juanes, negou as manifestacións do tenente de alcalde e voceiro do BNG en Nigrán, David Giráldez, sobre o Plan Xeral. Ao fío, dixo considerar necesaria a "refundación" do pacto actualmente en vigor entre socialistas e nacionalistas. "A conxuntura política na que se asinaron non é a mesma", expuxo.

A este respecto, non só se referiu á necesidade de sintonía entre os socios, senón a que "a conxuntura política na que se asinaron os pactos non é a mesma", ao respecto dos resultados das eleccións nas que o PPdeG recuperou a maioría absoluta. Así e todo, Juanes asegurou confiar en que se poida seguir mantendo o pacto PSOE-BNG no Concello, subliñando que iso pasa por unha "refundación" que recupere a "confianza, cooperación e cohesión", entre os socios. "A cidadanía non quere un goberno constituído en departamentos estancos onde afloren desconfianzas e discrepancias", analizou.

O punto de conflito fundamental na actualidade é a suposta ocultación do borrador do Plan Xeral de Ordenación Municipal (PXOM), denunciada polo grupo municipal do BNG, que acusa directamente o alcalde deste feito. O alcalde xustificou que o único que manexan os socialistas de momento é un "borrador do documento técnico de inicio" e insistiu en que o departamento municipal de Urbanismo fará as "correccións materiais pertinentes" e será entón cando presenten o documento ao resto da Corporación Municipal. Posteriormente, sería remitido á Consellería de Medio Ambiente para que se emita "o documento de referencia" e, a partir deste momento, "é cando se abrirá o debate social e político sobre o PXOM", asegura Efrén Juanes.


2.33/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: