Vieiros

Logo de que hai xa case 50 anos, o presidente estadounidense Kennedy se dirixise ao mundo subliñando que os consumidores eran xa unha nova categoría social, as demandas deste colectivo teñen mudado abondo. Aquela declaración que iniciou a celebración do Día Universal do Consumidor, que se conmemora este domingo, cobra nova relevancia no actual contexto de crise.

A telefonía, os transportes, os servizos públicos, a sanidade, a electricidade... son os sectores nos que se producen os maiores conflitos. As principais organizacións de defensa dos dereitos dos consumidores adican os seus esforzos a explicar as vías para a súa resolución e a denunciar as irregularidades que se seguen a producir.

Demandas diferenciadas para garantir uns mesmos dereitos
Así, a Unión de Consumidores de Galicia (UCGAL) denuncia eivas na facturación eléctrica e acusan a Unión Fenosa e a Begasa de non realizar correctamente as lecturas, de vulnerar o dereito á información e de non respectar os procedementos legais.

Pola súa banda, a Asociación de usuarios de bancos, caixas de aforros e seguros (ADICAE) dirixen as súas críticas aos "innumerábeis escándalos que veñen sacudindo o aforro dos consumidores nos últimos 10 anos, a inacción dos seus supervisores (Banco de España e CNMV), a xudicialización dos problemas dos cidadáns e a multiplicación dos abusos por parte das entidades financeiras".

Na mesma liña, Facua-Consumidores en Acción tamén aposta neste día pola reclamación dos dereitos: "nestes momentos de crise económica, o cidadán debe coñecelos con máis detalle", subliñan, ao tempo que reclaman un cambio na lexislación publicitaria para "frear a crecente explotación infantil na que están incorrendo moitas empresas".

A Organización de Consumidores e Usuarios (OCU) elixiu esta xornada para reivindicar unha nova Lei de Endebedamento Familiar, ademais de exixir a regulación do dereito de folga e a prohibición de fumar en todos os locais públicos. O seu lema "reclamar é fácil" pretende concienciar ao cidadán da importancia de demandar aquilo que lle corresponda por lei.

Finalmente, a Federación de Usuarios Consumidores Independentes (FUCI) tamén anima aos cidadáns a "non quedarse parados" ante as situacións de conflito e alertan do incremento das consultas e reclamacións no sector financeiro.