Vieiros

Vieiros de meu Perfil


Edición xeral

RSS de Edición xeral
Xuntanza de líderes co G20

Agoiro de multiplicación de conflitos se non hai axudas para as febles economías africanas

Os efectos da crise global fanse sentir en África onde, advirten, se non hai unha atención especial, abrollarán novos puntos de conflito e violencia.

Redacción - 09:00 17/03/2009

O exemplo de Zambia, onde medio millón de traballadores perderon en pouco tempo o emprego co que mantiñan as familias despois de paralizarse a actividade nas minas de carbón. O pau sufrido polos labregos tanzanos cando o prezo do algodón caeu á metade do seu valor... Son casos concretos de como a crise económica global bate de xeito específico sobre as economías africanas, xa de por si febles fronte a calquera movemento.

A situación foi subliñada este luns por Donald Kaberuska, presidente do Banco Africano de Desenvolvemento, quen cualificou de "emerxencia" o risco de colapso económico no continente africano. Kaberuska aproveitou a cita en Londres de representantes políticos de diversos países africanos co primeiro ministro británico, Gordon Brown, coa fin de que o problema estea na mesa da cimeira que o grupo de países industrializados, G20, celebrará o próximo mes de abril.

A redución dos ingresos a través de turismo ou o propio recorte detectado no envío de cartos que os traballadores emigrados lles fan a súas familias están xa axudando a afogar as economías africanas. Entre as voces que máis urxiron ao estabelecemento de compromisos concretos por parte dos países máis ricos está a de Ellen Johnson-Sirelaf, presidenta de Liberia, quen avisou do risco de caos e violencia na zona e recomendou inxectar axuda mentres sexa posíbel, recordando que será ao cambo menos custoso que o "envío e mantemento de forzas de paz" unha vez que os conflitos estoupen.

Recomendámoslles ampliar na BBC.


4.5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: