Vieiros

(haberá ampliación)


  "Os seus discursos aparecen tan rancios como calquera película de Fernando Esteso", espetoulles o voceiro parlamentario do PPdeG, Manuel Ruíz Rivas, aos voceiros parlamentarios de PSdeG e BNG no medio das gargalladas de toda a Cámara. Nunha inédita e durísima intervención por parte do voceiro do grupo que avala o novo Goberno, Rivas cargou con belixerancia contra o labor do Goberno saínte e non aforrou reproches contra socialistas e nacionalistas. "Foron vostedes soberbios na vitoria e agora son arrogantes na derrota", afirmou, insistindo en que os galegos "decidiron agora quen é futuro e quen é pasado". "Nunca o pobo se pronunciou tan alto e tan claro", dixo.

"Nós estamos dispostos a pasar páxina e mirar cara a adiante, pero non imos consentir as ofensas e insidias nin a Galiza nin a ningún dos nosos compañeiros", afirmou Rivas en referencia aos ataques realizados pola oposición ao deputado popular Agustín Hernández. "Acabou a Semana Santa e con isto non lles imos poñer a outra meixela", dixo. "A nosa coalición é con Galiza, vostedes quédense cos seus chascarrillos", arrebolou contra o final da súa intervención.