Vieiros

Os empresarios galegos ven con bos ollos o novo organigrama da Xunta, xa que, consideran, "está formado por persoas novas e con ganas de traballar", e cualifican de "positiva" a fusión de consellarías, especialmente a de Industria e Economía, como unha medida para combater contra os efectos da crise.

Segundo declarou o presidente da Confederación de Empresarios de Galicia (CEG), Antonio Fontenla, nunha situación de crise é "importante" que dúas consellerías como Economía e Industria camiñen "xuntas", aínda que recoñeceu que non ten unha valoración "clara" do seu funcionamento posto que se trata dunha "situación nova" para o noso país. "Aínda non sabemos as competencias, pero intuímos que será positivo", concluíu.

Fontenla gabou a titular de Traballo e Benestar, Beatriz Mato, e ao de Obras Públicas e Medio Ambiente, Agustín Hernández, ao que cualificou como unha "boa fichaxe" de Feijoo, e unha persoa de "total e completa honorabilidade". Finalmente, o presidente da CEG referiuse á demanda de "colaboración" formulada o sábado polo presidente da Xunta, Alberte Núñez Feijoo, no seu discurso de toma de posesión, e asegurou que os empresarios ofrecerán "todo o apoio" ao dirixente autonómico porque todos perseguen o "obxectivo común" de que "Galiza supere a crise o antes posible".