Vieiros

Vieiros de meu Perfil


Galego.org

Xestionado por Vieiros
RSS de Galego.org
Freo ao galego nas aulas

O BNG ve a intención de "impoñer de facto un modelo lingüístico que exclúa á nosa lingua do ensino"

Os nacionalistas esíxenlle a Feijoo que expoña no Parlamento a estratexia en materia de lingua no canto de debullala nos medios de comunicación.

Redacción - 20:15 29/04/2009

Os portavoces de Educación e Lingua do BNG, Carme Adán e Bieito Lobeira criticaron esta cuarta feira que o propio Goberno convide os centros a incumprir o decreto do galego no ensino, "aínda vixente", creando "inseguridade" na propia comunidade docente. En resposta á afirmación de Núñez Feijoo sobre a "necesidade de repoñer os dereitos civís", o BNG retrúcalle ao presidente da Xunta que "é un dereito civil garantir a posibilidade de coñecer e expresarse correctamente en lingua galega para todo o alumnado do noso país".

Lobeira e Adán lamentan as declaracións de Núñez Feijoo nunha entrevista radiofónica nun medio de comunicación estatal sobre o uso do galego nas aulas galegas e indican que esta decisión "contradí o seu compromiso adquirido no Parlamento e as declaracións do seu Conselleiro de Educación nas que falaba de procurar o consenso no tema da lingua".

O grupo do BNG insta a Feijoo a levar o debate "sobre un tema de esta relevancia" ao Parlamento. Aló, piden os nacionalistas, os populares deberan explicar "cal é a auténtica política lingüística do Partido Popular e como a pensa aplicar desde o Goberno". Do coñecido a través dos medios, opinan os voceiros do Bloque que o PP parece apostar pola "vulneración da legalidade vixente e unha auténtica provocación por parte do goberno galego que pretende impoñer, de facto, un modelo lingüístico que exclúa á nosa lingua do ensino".


4.38/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: