Vieiros

A compañía estatal de telefonía móbil, Movilnet,  lanzará ao mercado o primeiro teléfono móbil, modelo ZTE C366, bautizado como El vergatario (o mellor, o máis xeitoso en argot venezuelano),  cun prezo de venda ao público de 30 Bolívares Fuertes (10.30 Euros). O teléfono está ensamblado na empresa socialista Venezolana de Telecomunicaciones (Vetelca).

"Será lanzado nos próximos días. Vexan a calidade deste teléfono, é lizgairo, bonito, bo e barato, deseñado por Movilnet", declarou o presidente venezuelano Hugo Chávez durante o programa dominical Aló presidente na súa edición número 329, realizando en Macarao, na cidade de Caracas.

Este teléfono foi deseñado por profesionais de Movilnet e ensamblado pola empresa Vetelca, que ten como meta producir para este ano 250 mil teléfonos móbiles en dous ou tres modelos, nos que se está traballando para o mercado venezuelano e o mercado latinoamericano, a baixos custos e tarifas moi baixas.

El vergatario é o primeiro teléfono totalmente fabricado en Venezuela, cómodo e lizgairo, de fácil acceso, que posúe cámara fotográfica e MP3, entre as súas funcións.

"A ciencia e a tecnoloxía ao servizo do pobo, non das elites, nin de caprichos persoais (…); Chegará o día en que fabriquemos millóns de teléfonos para Cuba, América Latina...", afirmou o presidente Chávez.

Logros de Movilnet

No ano 2008 a compañía de teléfonos móbiles do Estado, Movilnet, vendeu 8 millóns de unidades, e para este ano espérase que se chegue a 9 millóns, dos cales 600 mil serán ensamblados en Vetelca e para o 2010 espérase a fabricación dun millón de teléfonos móbiles.