Vieiros

Latinoamérica recuperará o crecemento antes que as economías máis avanzadas grazas á solidez dos seus sistemas financeiros, entre outros motivos. Isto revela un informe dado a coñecer este mércores polo Fondo Monetario Internacional (FMI), que revisou o crecemento da contracción dos EUA até o 3% para este ano.

"Non caben dúbidas de que a turbulencia global está afectando a rexión", pero "ela ten unha preparación moito máis elevada dende o punto de vista da solidez das finanzas públicas", explicou o director do Departamento do Hemisferio Occidental do FMI, Nicolás Eyzaguirre, durante a presentación do informe Perspectivas económicas rexionais, na cidade de Bogotá, en Colombia.

O experto detallou que América Latina e o Caribe "non afrontan unha crise fiscal como outras rexións en desenvolvemento, nin unha crise bancaria como en Estados Unidos e gran parte de Europa". Eyzaguirre subliñou que a rexión rexistrará unha contracción económica no seu conxunto do 1,5% este ano, pero que en 2010 medrará até o 1,6%. As economías de Latinoamérica máis afectadas en 2009 son México, cun Produto Interior Bruto (PIB) que caerá 3,7%; Venezuela (-2,2%) e Ecuador (-2,0%). Pola contra, as que máis medrarán este ano son Perú (3,5%), Panamá (3,0%) e Bolivia (2,2%).

O impacto da crise será menor en América Latina, e a recuperación máis rápida
O FMI prognosticou unha contracción do PIB mundial do 1,5% en 2009, pero o impacto desta crise será menor en Latinoamérica e o Caribe e "a recuperación máis rápida", anotou. "Por primeira vez -de acordo co organismo-, moitos países da rexión puideron responder á crise externa con políticas activas para impulsar a produción e o emprego e protexer os máis febles". O mellor punto é para a banca: "Seis meses despois do desastre de Lehman Brothers, ningún sistema bancario latinoamericano rexistrou crise", sinala o FMI. Segundo o informe, a situación responde a que estiveron "pouco expostos a produtos financeiros estructurados e activos tóxicos".

Así as cousas, a banca latinoamericana "é máis resistente que no pasado porque reduciu fortemente os seus puntos débiles, como a exposición ao risco cambiario ou a dependencia do financiamento externo, e estableceu reservas de capital". Aínda así, o FMI chamou a atención sobre a caída das remesas que envían os inmigrantes aos seus países de orixe, o prezo das materias primas e o sector turismo.