Vieiros

Vieiros de meu Perfil


Edición xeral

RSS de Edición xeral
Polémica no P2P

Os internautas anoxados pola venda de The Pirate Bay

Os usuarios acugularon a páxina de queixas, e os fundadores do portal abriron unha aplicación que lles permite ás persoas descontentas borrar a súa conta.

Redacción - 09:00 03/07/2009

Hai internautas que aínda lembran a desaparición de Napster, o primeiro programa de P2P; que lle reprochan aos seus creadores que abandonasen a loita, e que aínda ollan o caso con tristeza. Mentres, hai outros que están moi indignados coa noticia de que The Pirate Bay decidise vender o portal. No seu blog, na entrada na que os propietarios anuncian a venta a unha empresa de videoxogos, a maioría dos comentarios son de crítica, porque esta operación comercial na rede creou moita polémica.

A venda de The Pirate Bay farase efectiva cando Gaming Factory X pague os 5,75 millóns de euros acordados, o vindeiro mes de agosto. O presidente da empresa, Hans Pandeya, xa sinalou que tiñan a intención de converter o principal portal do mundo de intercambio de arquivos vía BitTorrent nun negocio legal, que pague o copyright aos produtores de contidos. Este feito indignou a moitos dos usuarios do portal. As protestas medraron tanto que os creadores de The Pirate Bay decidiron desenvolver unha aplicación para que os usuarios que queiran borrar a súa conta -aínda cando o portal non subministra datos das persoas rexistradas nel-, poidan facelo. Noutro retallo desta entrada no blog, os donos de The Pirate Bay xustifícanse, sinalando que teñen razóns para vender a páxina, que queren que o portal continúe funcionando, e que esta foi a alternativa que lles quedou, porque non dispoñen de cartos para pagar o seu crecemento.

The Pirate Bay, con máis de 20 millóns de usuarios en todo o mundo, é unha das cen páxinas más visitadas da rede. Os catro fundadores do portal foron condenados, hai dous meses, a un ano de prisión e a unha multa de 2,7 millóns de euros, cando un tribunal de Estocolmo os declarou culpábeis de ter contribuído a difundir material protexido por dereitos de autor.


0/5 (0 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: