Vieiros

O ministro de Saúde de Arxentina, Juan Manzur, confirmou este venres que os infectados por gripe A no país, que acaba de entrar no inverno, poderían ascender a 100 mil. Destes só uns 2.800 foron confirmados por análises de laboratorio, aínda que só se estudan os casos dos ingresados.

O ministro, que acompañou este venres á presidenta arxentina, Cristina Fernández, a un dos hospitais onde se concentran os doentes graves de gripe A, indicou que até o de agora son 44 as vítimas mortais certificadas por laboratorio -os medios elevan a cifra a 55.

A anterior ministra arxentina de Saúde, Graciela Ocaña, presentou a súa dimisión o pasado luns, un día despois das eleccións, debido á crise pola epidemia no país.

Tres días antes, o ministerio cifrara en 1.587 os infectados polo virus confirmados por laboratorio no que foi o último informe sobre a enfermidade. A partir desa data, a carteira deixou de dar cifras oficiais logo de dous meses de emitir comunicados a diario.

Os expertos estiman que o pico máis alto pode chegar a mediados de xullo e alcanzar unha cifra que roldaría o millón de afectados.

Máis información

• Clarín: Controversia en el Gobierno por el manejo de las cifras de la Gripe A

• La Nación: Cristina reclamó responsabilidad y prudencia ante la epidemia