Vieiros

O presidente da Xunta, Alberto Núñez Feijóo, e o presidente da Comisión de Coordinación e Desenvolvemento Rexional do Norte de Portugal, Carlos Lage, manifestaron este martes o seu compromiso de relanzar a Comunidade de Traballo Galiza-Norte de Portugal para reforzar a cooperación transfronteiriza e consolidar o papel da Eurorrexión.

Na súa primeira visita a Portugal como presidente da Xunta, Núñez Feijóo anunciou que a Eurorrexión impulsará unha acción de lobby sobre a Comisión Europea, e que traballará para preparar o período-marco financeiro do 2014-2020 dos fondos europeos INTERREG, co obxecto de "recuperar o diñeiro perdido na última negociación, onde pasamos de 600 millóns de euros a 200 millóns".

Na xuntanza acordouse a creación, no seo da Comunidade de Traballo, de dúas novas comisións sectoriais, unha de Xuventude, e outra de Cultura e Universidades, que incluirá ademais temas de lingua, educación e turismo, e que permitirá aproveitar as sinerxías do Xacobeo 2010 e da Capitalidade Europea de Guimaraes en 2012.

No encontro tamén se acordou fixar o mes de outubro como "data máxima para empezar a funcionar" a Agrupación Europea de Cooperación Territorial, un organismo que terá a sede definitivamente en Vigo, un director portugués e un director adxunto galego. Feijóo e Lage coincidiron finalmente en destacar a importancia de impulsar a "eurocidade" Verín-Chaves, como unha experiencia pioneira que pode servir de modelo exportable para outras actividades semellantes.