Vieiros

"As competencias de gandaría e agricultura son da Xunta", algo que "calquera persoa pode comprobar lendo o Estatuto de Autonomía", dixo Elena Espinosa, a ministra de Medio Ambiente, Medio Rural e Mariño (MARM) nunha entrevista en Radio Nacional de España (RNE). Deste xeito, explicou a galega que non se adopten máis medidas para paliar a crise do sector lácteo dende o seu departamento, malia recoñecer que lle gustaría "botar un cabo" aos gandeiros galegos.

Acordo do leite e plan estratéxico
A ministra felicitouse do acordo asinado a pasada semana entre a industria, os produtores e a distribución, que entende que abre un "futuro esperanzador" para o sector. Con todo, subliñou que atendendo á lexislación non se pode fixar un prezo mínimo, tal e como piden os sindicatos. Pola contra, defendeu o estabelecemento de "prezos de referencia", unha medida que considerou parella ás tomadas noutros países europeos.

Logo de que a Xunta anunciase a posta en marcha dun Plan Estratéxico para o Sector Lácteo, a titular do goberno español tamén adiantou unha medida similar a nivel estatal. "Imos pór enriba da mesa 70 millóns de euros ao ano", asegurou ao tempo que subliñou que se elaborará un plan estratéxico estatal que se prolongará até o ano 2015. "Nesta data executarase a eliminación das cotas", recordou, polo que "son necesarias medidas para preparar ao sector".