Vieiros

"É unha derrota máis tanto para SGAE como para todo o movemento 'antipiratería', e para todos aqueles que intentan criminalizar o intercambio de arquivos en internet", destacan este mércores desde a empresa galega RedCoruna, en cuxos servidores estaba acubillada a web El rincón de jesús, que inclúe ligazóns a outras páxinas de descarga gratuísta de contidos audiovisuais.

O xulgado nº7 de Barcelona desestimou a solicitude de medidas cautelares que fixera a Sociedad General de Autores (SGAE) reclamando peche definitivo da web. Entende o tribunal que o sitio non obtiña ningún tipo de beneficio económico como contrapartida por incluír eses enlaces.

A maiores, o maxistrado avalía que o P2P "non vulnera a propiedade intelectual", considerando que se trata dun simple sistema de transmisión de datos entre usuarios de internet que "non violaría dereito algún protexido pola Lei da Propiedade Intelectual". Expón o xuíz García Orejudo que nestas redes tamén existe material que non está suxeito a dereitos de autor, e obras que aínda tendo protección de copyright, "a súa protección no está encomendada á SGAE".