Vieiros

Dende que se fundou en 1955, o Partido Liberal Democrático puxo e quitou presidentes agás nun breve período da década dos 90. Esta formación política, de orientación conservadora e firme aliada de EUA na zona, vive un enorme desgaste debido, en boa parte, á crise económica que golpea especialmentes ás capas baixas e medias da sociedade xaponesa. Ningunha enquisa coida que os liberais de Taro Aso poidan volver formar goberno logo dos comicios que se celebrarán a vindeira fin de semana.

Algunhas sondaxes chegan a darlle 300 dos 480 escanos ao Partido Democrático de Xapón, que lidera Yukio Hatoyama. A organización, fundada en 1998, ten unha vocación máis socialdemócrata, aínda que está formada por unha amalgama de cadros entre os que non faltan numerosos ex dirixentes liberais.

Os partidarios de Hatoyama propugnan unha mellor relación con China e unha menor dependencia dos ditados de Washington, que dende a Segunda Guerra Mundial tivo unhas relacións privilexiadas neste país.