Vieiros

Vieiros de meu Perfil


Edición xeral

RSS de Edición xeral
"Medidas anticrise"

Unha escola irlandesa pide ás súas alumnas que leven papel para o baño

En Galiza, a Xunta recomendou hai uns días aos directores dos centros públicos que "recorten o gasto en luz e auga".

Redacción - 13:00 07/10/2009
As escolas están obrigadas a aforrar

As escolas están obrigadas a aforrar

Na Irlanda como na Galiza. Se hai uns días, o PSdeG denunciaba que a Consellaría de Educación estaba a "denigrar e vituperar" o ensino público pola súa petición aos directores dos centros públicos de que "como na posguerra, recorten gasto en luz e auga", agora é a illa celta a que se apunta á moda de loitar contra a crise a costa do ensino. No entanto, no caso irlandés é unha iniciativa do privado.

Concretamente, os pais das alumnas da escola feminina de St. John, no condado de Cork, recibiron a semana pasada unha carta da directora, Catherine O'Neill, solicitando que as cativas levasen o seu propio papel para o baño, informa o diario The Guardian.

A medida, segundo a dirección do colexio, é voluntaria e ocasional, e que se adoptou debido aos recortes. "Tentamos recortar gastos e asegurar que as nosas subvencións se destinan ás necesidades educativas", argumentou O'Neill.

"Cremos que esta petición non suporá unha carga sobre as familias, só esperamos gastar o diñeiro na educación", afirmou. "Somos conscientes dos recortes, non pretendiamos insultar ninguén", engadiu, e indicou que non cre que a súa escola sexa a primeira en facer este tipo de peticións.

O maior sindicato irlandés, INTO, asegurou que os recortes veñen de vello. Un seu portavoz, Peter Abranden, sinalou que "hai dous anos o goberno prometera gastar 252 millóns de euros para mellorar os computadores, mais non gastou nin un céntimo".


0/5 (0 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: