Vieiros

Polo menos 30 persoas morreron e preto de 45 resultaron feridas por mor dun ataque provocado por un suposto home-bomba no distrito de Shangla, preto do val de Swat, na fronteira noroeste de Paquistán. Segundo confirmaron fontes militares citadas polo rotativo 'Dawn', a bomba estourou este luns preto dun vehículo militar.

Os talibáns paquistanís están a aumentar a súa actividade nos últimos días. Así, o sábado atacaron o cuartel xeral en Rawalpindi, no leste do país. As forzas de seguridade lograron rescatar 39 reféns, pero outros tres morreron, así como nove milicianos e once soldados. Un portavoz talibán, Azam Tariq, dixo o luns que o ataque "levouno a cabo unha unidade do Punjab". "Vingaremos os nosos mártires e cometeremos máis atentados, tanto contra o cuartel xeral como contra algo meirande", dixo referíndose ao cuartel do exército.