Vieiros

Vieiros de meu Perfil


Edición xeral

RSS de Edición xeral
NO PORRIÑO

O curioso caso dun sumario que desaparece do xulgado

Extravíanse os catro tomos do procedemento aberto contra o ex-alcalde pola denuncia de acoso sexual presentada por unha funcionaria.

Redacción - 12:05 25/11/2009
O ex-alcalde do Porriño, Xosé Manuel Barros, foi acusado de acoso sexual en 2002

O ex-alcalde do Porriño, Xosé Manuel Barros, foi acusado de acoso sexual en 2002

Xa non é o primeiro caso que coñecemos do extravío, perda ou desaparición de importantes documentos que poderían comprometer o futuro dalgunhas persoas. Pasou co escrito oficial da entrega do Pazo de Meirás a Franco ou nos casuais danos que uns roedores ocasionaron en documentación contra Cacharro Pardo nos xulgados de Lugo. Agora, unha noticia semellante xorde no Porriño, onde desapareceron os catro tomos, con case dous milleiros de folios, que integraban o procedemento seguido contra o ex-alcalde do Porriño, Xosé Manuel Barros, nunha denuncia por acoso sexual formulada por unha funcionaria.

Ao parecer, a documentación desapareceu do Xulgado de Instrución número 1 do Porriño, coa curiosa circunstancia de que non foi forzada ningunha porta nin ventá das dependencias. Esta perda favorece casualmente ao imputado, segundo explica o propio avogado da acusación, Xesús Carballeda, e produciuse logo de que as pechaduras fosen cambiadas nos pasados días por mor do roubo dun bolso a unha traballadora.

O pasado 29 de outubro deuse a coñecer o auto de apertura do xuízo oral polo que Barros terá que sentarse na bancada dos acusados ante o Xulgado do Penal de Pontevedra para responder, concretamente, polos presuntos delitos de lesións contra a saúde mental, acoso sexual, prevaricación e ameazas a unha funcionaria. O avogado xa explicou que todo o procedemento está a ser "unha carreira de obstáculos".


4,82/5 (11 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: