Vieiros

Vieiros de meu Perfil


Fwwwrando

RSS de Fwwwrando
A informática no ensino

As empresas de software libre rebélanse contra o Ministerio de Educación

Pídenlle unha entrevista para expoñerlle as vantaxes das solucións abertas. Denuncian discriminación e malversación de fondos no acordo con Microsoft.

Redacción - 09:00 05/01/2010

A Asociación de Empresas Galegas de Software Libre (AGASOL), integrada na Federación Española de Empresas de Software Libre (ASOLIF) apoia a solicitude dunha reunión co ministro de Educación, Ángel Gabilondo, para expoñerlle as vantaxes das ferramentas libres adaptadas a fins pedagóxicos.

A solicitude, exposta mediante unha carta aberta, prodúcese como consecuencia do acordo ao que chegou o ministerio coa multinacional Microsoft para que nas cidades onde conserva as competencias educativas (Ceuta e Melilla) os portátiles dos colexios leven o software da empresa estadounidense. O texto déixalles aberta a porta a outros gobernos para que se sumen ao acordo.

Na carta, ASOLIF salienta experiencias pioneiras a nivel mundial que se produciron no Estado Español, como as postas en marcha en Estremadura, Andalucía ou Valencia. Por iso considera incomprensíbel que, habendo casos de éxito tan salientábeis, o ministerio aposte polo modelo oposto, baseado en ferramentas privativas dun único fabricante. A asociación entende que se está a producir un caso de discriminación e de mal uso dos fondos públicos na sinatura de acordos para a adquisición de material, software e servizos cun provedor único, habendo solucións de igual ou superiores prestacións cun custo inferior.

A entidade denuncia, ademais, que o proxecto de introdución dos computadores no ensino non se licitase mediante concurso público, como si fixeron diversas comunidades autónomas.


5/5 (8 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: