Vieiros

Co obxectivo de aforrar enerxía eléctrica o presidente Chávez, durante o primeiro consello de ministros deste ano anunciou a obrigatoriedade dun horario corrido para as oficinas públicas que "será de 8 da mañá a 1 da tarde e comezará a ser efectivo a partires da semana entrante" dixo o presidente Chávez.

"Unha das decisións que están sendo tomadas para aforrar enerxía, é estabelecer o horario continuado nas oficinas públicas, a excepción das oficinas de atención ao cidadán. Continuado desde as 8 ás 13 horas e só en Caracas lograremos aforrar preto de 187 megavatios. Esta é unha das varias medidas que aprobamos".

O presidente Chávez lembrou que estas decisións orientadas ao aforro de enerxía eléctrica estánse tomando dado o baixo nivel rexistrado na represa hidroeléctrica de Guri, a cal subministra o 90% da electricidade que consume Venezuela.

Igualmente lembrou que os baixos niveis de Guri son produto da marcada seca que atravesa o país, produto do cambio climático. "Isto é unha crise mundial", sinalou.