Vieiros

O Goberno pechou a final de ano as oficinas comarcais de Igualdade e Benestar. En total, 61 traballadoras, contratadas en procesos selectivos organizados polo bipartito, quedaron na rúa. O executivo tomaba a decisión logo de semanas de acusacións cruzadas. A propia secretaria xeral de Familia e Benestar, Susana López Abella, chegou a tildar a estes técnicos de “enchufados”. A reacción dos traballadores foi denunciar no xulgado á alto cargo do Goberno por difamación.

Mais o conflito laboral prosegue nun organismo público no que traballan arredor de 1.200 persoas. A CIG, sindicato maioritario no Consorcio, ten convocado para este martes un paro xeral para reclamar a readmisión das despedidas, a aplicación do convenio negociado o ano pasado e a execución das oposicións paralizadas polo novo Executivo. O acto central da folga será unha manifestación que partirá ás 11.30 horas da praza do Toural cara a San Caetano.