Vieiros

O executivo de Rodríguez Zapatero puxo a venda antes que se vexa a ferida. O ministro de Traballo sinalou este luns que é previsíbel que o paro volva a subir en xaneiro e que tamén o fará ao longo de todo o ano, aínda que confiou que esta destrución de postos laborais sexa “máis atenuada”.

Corbacho reiterou que o mes de xaneiro é tradicionalmente malo para o emprego. Porén, insiste na idea de que en 2010 a perda de empregos no Estado Español vai ser máis moderada ca no ano pasado.

Nunha intervención parlamentaria, o ministro adiantou que o Consello de Ministros vai analizar esta semana unha posíbel reforma na Seguridade Social. Aínda que mantén que non se prevén recortes de dereitos, Corbacho insiste que o envellecemento poboacional é un fenómeno a ter moi en conta a medio prazo.