Vieiros

Vieiros de meu Perfil


Edición xeral

RSS de Edición xeral
COA ABSTENCIÓN DO PP

Cangas, contra as corridas taurinas

Cos votos favorábeis do goberno tripartito xa extinto, o concello é o primeiro en declarase oficialmente contrario aos touros.

Redacción - 13:45 01/02/2010

As festas de Cangas non poderán incluír nos seus programas corridas de touros. De feito, non as incluían dende hai xa máis de trinta anos, mais agora a celebración deste tipo de festexos está oficialmente prohibida. O concello do Morrazo foi o primeiro de toda Galiza en declararse “vila contraria ás corridas de touros e amiga dos animais”, logo dunha movida sesión plenaria.

A moción, presentada por Alternativa Canguesa de Esquerdas (ACE), contou ademais cos votos favorábeis de BNG e PSdeG, é dicir, dos grupos que conforman o grupo de goberno recentemente esgotado. O PP abstívose na votación alegando que esta petición non tiña “demasiado sentido en Cangas, onde non se recorda ningún espectáculo deste tipo dende a época de Lois Pena”. O municipio sumouse así os mais de 70 concellos de Cataluña, Euskadi e Baleares que xa adoptaran esta decisión e convértese no primeiro galego en facelo.

O acordo implica que o Concello de Cangas “non será cómplice dun espectáculo cruel como o das corridas de touros nin de ningún outro espectáculo onde se torturen animais” e non permitirá tampouco que se anuncien espectáculos deste tipo na súa web nin en ningún outro medio de difusión de titularidade municipal.

Consenso dun goberno roto
A normalidade volveu este luns ao concello de Cangas logo deste pleno no que, ademais, se fixo efectivo o que Alternativa Canguesa (ACE) viña anunciando dende hai meses: a ruptura do pacto de goberno. Os concelleiros desta formación, Mariano Abalo, Xosé Manuel Pazos e Maruchi Álvarez, comunicaron o abandono das súas funcións como membros do grupo de goberno, que agora queda en minoría cos cinco edís do BNG e os catro do PSdeG. A oposición queda agora composta por 12 concelleiros: oito do PPdeG, a edil non adscrita (anteriormente nacionalista) e os tres de ACE.

Agora, na semana despois, os diferentes partidos amosan as súas reaccións. Dunha banda, o PSdeG recoñece o difícil da situación e apunta a que “valorará se segue no goberno e en que condicións”. O BNG descarta definitivamente a dimisión de Clara Millán (petición que facía ACE para non rachar o tripartito) e convida a Abalo a presentar unha moción de censura co PP. Pola súa parte, os de Alternativa Canguesa reiteran que é imposíbel calquera acordo cos populares e estes últimos aseguran que Millán perdeu toda lexitimidade para manter a alcaldía e piden que o Bloque se someta a unha moción de confianza. Agora só queda agardar acontecementos.


5/5 (11 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



A plataforma Mellor sen touradas presentou a comezos de mes unha iniciativa similar en 19 concellos
A plataforma Mellor sen touradas presentou a comezos de mes unha iniciativa similar en 19 concellos
O goberno tripartito estaba formado por BNG, ACE e PSdeG
O goberno tripartito estaba formado por BNG, ACE e PSdeG
Os diferentes posicionamentos sobre a posíbel paralización das obras de Salgueirón sembraron as diferenzas entre o goberno tripartito
Os diferentes posicionamentos sobre a posíbel paralización das obras de Salgueirón sembraron as diferenzas entre o goberno tripartito