Vieiros

O conflito laboral que se vive en Arriva ten en pé de guerra aos traballadores. A tensión entre representantes sindicais e patronal chegou a tal punto que este mércores a CIG anunciou que recorrerá ao TSXG para denunciar persecución sindical. Segundo o sindicato nacionalista, a situación é tan extrema que dende a propia empresa se lle terían ensinado a traballadores eventuais fotos de delegados sindicais. A CIG afirma que dende Recursos Humanos lle teñen advertido a algún novo operario que as relacións con estes representantes sindicais eran motivo de despedimento.

Varios dirixentes do sindicato nacionalista protagonizaron unha conferencia de prensa para explicar a orixe do conflito. Segundo sosteñen, a compañía “persegue” a afiliados da CIG dándolles as peores quendas e procedendo a despedimentos. Dende o sindicato apuntaron directamente á responsábel de Recursos Humanos, á que acusan de amedrentar a algúns traballadores: “Esta señora vai sentar no banquillo, porque a CIG non vai consentir que este tipo de medidas queden impunes, tanto no terreo laboral como penal: non se pode andar pola vida ameazando a xente e vulnerando a liberdade sindical e pretender que che saia gratis”

Poden ler na páxina da CIG unha nota na que o sindicato explica o acontecido.