Vieiros

Vieiros de meu Perfil


Edición xeral

RSS de Edición xeral
DENUNCIA DE SOS COUREL

Unha estrada pon en perigo o patrimonio arquitectónico do Courel

Os veciños denuncian un proxecto que non conta cos preceptivos informes de Patrimonio nin con Estudos de Impacto Ambiental.

Redacción - 09:50 04/02/2010
O Castelo de Torés (As Nogais) verase afectado polas obras

O Castelo de Torés (As Nogais) verase afectado polas obras

A estrada en cuestión é a que comunica Becerreá con As Nogais. O proxecto para a súa ampliación data do anterior goberno provincial, dirixido por Francisco Cacharro, e actualmente está en trámite o procedemento de expropiación forzosa aos veciños dos terreos afectados (BOP-Lugo nº 268). Porén, dende diferentes colectivos como SOS Courel, Adega ou LugoPatrimonio denuncian a afección que estas obras terán sobre diferentes elementos de interese patrimonial, entre eles dous catalogados como Bens de Interese Cutlural (BIC).

Sen avaliar o impacto ambiental
“O actual goberno bipartito da Deputación asume os erros do anterior e leva á práctica a política de feitos consumados”, denuncia Orlando Álvarez, de SOS Courel. Este colectivo denuncia que o primeiro tramo que se vai construír (de 5,5 quilómetros dun total de 18 e cun orzamento de cinco millóns de euros) atravesa o Val de Torés (As Nogais) e pasa á beira do Castelo de Torés, dunha vivenda tamén catalogada como BIC e da igrexa. “Traballos deste tipo con grande maquinaria acabarán por derrubar este patrimonio”, apunta Álvarez.

Logo de facer pública a súa denuncia, a Deputación advertiu de que o proxecto de ampliación da estrada aínda non está aprobado definitivamente e que agardará polo visto bo de Patrimonio, un extremo que nega SOS Courel: “está xa tan avanzado que os veciños xa non están en prazo de reclamar por vía administrativa as súas expropiacións, só poden por medio dun contencioso no xulgado”, subliña. Nesta liña, destaca que non foron emitidos ningún tipo de informe: “nin estudo de impacto ambiental, nin documentos de Patrimonio... o proxecto está feito por un enxeñeiro e punto e supón un atentado contra a nosa riqueza cultural e natural”.

Malos precedentes
Mais esta non é a primeira agresión que sofre o Courel pola ampliación dunha estrada. Un exemplo é a vía que vai até a Autovía A6 (Pedrafita do Cebreiro): as reformas desta estrada, que comezaron en 2003, aínda non completaron a metade dun percorrido total de 18 quilómetros. Até o de agora, só se reformaron seis, en concreto no tramo a Pedrafita. "A este paso conseguirase prolongar as carencias de comunicación e os impactos de xeito indefinido", asegura Álvarez, quen tamén asegura non entender porque agora se retoma a obra por Becerreá en troques de continuar por Pedrafita.

Ademais, denuncia a “catástrofe paisaxística e ambiental” da Rede Natura que supuxeron as obras xa rematadas: “atravesaron polo medio a Mina da Romana da Toca, impactando gravemente nunha paisaxe de recoñecidos valores naturais e culturais, nun Espazo natural das Normas Complementarias e Subsidiarias da Provincia de Lugo”. Ademais, “non se habilitaron pasos de fauna e obstruíronse os poucos que había ao substituír as pontes por tubos e practicar taludes totalmente verticais e insalvábeis”.

Finalmente, SOS Courel subliña que o trazado real da estrada “non coincide co dos planos do proxecto”. Segundo explica Orlando Álvarez, “iso pode comprobarse facilmente, observando na ladeira os sucesivos intentos de trazado abandonados, resultado do método ensaio-error”. Ao parecer, a plataforma da estrada “asentouse sobre escombreiras sen compactar, polo que está continuamente afundíndose, obrigando a unha reparación permanente a base de pedrapléns que xa se tiñan que ter practicado na obra inicial”.


Ligazóns

4,67/5 (15 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Imaxe do tramo a Pedrafita. Como consecuencia da falta de muros, as curvas que se meten na ladeira teñen un radio menor que o proxectado.
Imaxe do tramo a Pedrafita. Como consecuencia da falta de muros, as curvas que se meten na ladeira teñen un radio menor que o proxectado.
Val ocupado por un recheo sobre o río Vilela, que foi entubado. Convértese nun obstáculo para a fauna, ademais do impacto paisaxístico
Val ocupado por un recheo sobre o río Vilela, que foi entubado. Convértese nun obstáculo para a fauna, ademais do impacto paisaxístico
Val tapado e destruído por multitude de entulleiras e taludes demasiado altos
Val tapado e destruído por multitude de entulleiras e taludes demasiado altos
Destrución do bosque de ribeira e invasión de escombros no cauce do río / Imaxes: SOS Courel
Destrución do bosque de ribeira e invasión de escombros no cauce do río / Imaxes: SOS Courel