Vieiros

Vieiros de meu Perfil


Edición xeral

RSS de Edición xeral
Segundo a ex conselleira de Pesca

O traslado de Ence ás Pontes "frustrouse" porque o que pedía a empresa "era excesivo"

Carme Gallego, secretaria de Medio Ambiente do PsdeG, revela que o anterior executivo non puido chegar a acordo coa empresa para o levantamento do complexo de Lourizán.

Europa Press - 09:00 17/02/2010

A secretaria de Medio Ambiente do PSdeG e ex conselleira de Pesca, Carmen Gallego, asegurou este martes que o anterior Goberno negociou o traslado de Ence ao municipio coruñés d'As Pontes, pero "non se chegou a un acordo" posto que, argumentou, o que nese momento pedía a empresa "era excesivo" a xuízo do executivo que dirixía Emilio Pérez Touriño.

De feito, a deputada socialista sinalou que a das Pontes era unha situación alternativa "bastante consensuada e mesmo asumida" no propio concello coruñés, onde existen acordos plenarios ao respecto. Non obstante, precisou, a negociación truncouse porque a empresa non se conformou coa proposta da Xunta que, segundo Gallego, estaba disposta a financiar parte da nova situación. "Na nosa mente estaba manter a actividade industrial e os postos de traballo, pero en ningún caso facerlle un favor a unha empresa que, á fin, ten que abandonar a súa actual situación na Ría de Pontevedra en 2018", advertiu.

Así as cousas, o PSOE pídelle agora á Xunta que preside Alberto Nuñez Feijoo que aclare a súa postura respecto ao futuro de Ence, e que canto antes encare a negociación para o traslado porque "hai que negociar e chegar a un acordo coa empresa e os sindicatos, buscar unha situación alternativa e construír a nova fábrica". A xuízo de Carme Gallego todo iso levará entre seis e sete anos e "se o acordo para o traslado se demora máis alá de 2010 ou como moito 2011, non se chegará a tempo para 2018", cando vencerá o prazo da concesión que permite a situación de Ence en dominio público.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: