Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Primeiras actividades en lembranza do artista

Seoane é, con Castelao, "a figura máis importante da Galiza do século XX"

Así o subliñou Ramón Villares, presidente do Consello da Cultura, na presentación do primeiro evento no centenario de Luís Seoane.

Redacción - 11:15 23/03/2010

A súa "capacidade de diálogo coa cultura galega" e a súa "integración na cultura universal" foron cualidades salientadas polo presidente do Consello da Cultura, Ramón Villares, na presentación do congreso internacional Luís Seoane. Galicia-Arxentina: unha dobre cidadanía. A sede do Consello compartirá coa Fundación Seoane a celebración desta cita entre 6 e o 8 de abril. "Un dos aspectos novidosos do congreso é analizar como mudou a obra de Seoane a imaxe estética de Galiza", indicou Villares.

"O congreso é un diálogo entre a educación galega de Seoane, a instalación en Arxentina e o retorno desa educación a Galiza", explicou o historiador, lembrando que durante o seu periodo arxentino, Seoane "sempre falou de retorno, de devolución a Galiza do que Galiza lle deu". Para analizar a poliédrica figura do artista, alternaranse conferencias de expertos arxentinos e galegos que vincularán esa idea de retorno e tentarán ubicar a Seoane no contexto da cultura arxentina da época e comprender o seu papel na cultura galega do século XX.

Na presentación tamén estiveron presentes Alberto Ruiz de Samaniego, director da Fundación Luís Seoane e Xosé Díaz, secretario da Fundación e membro do comité organizador. Samaniego aproveitou para presentar os contidos da exposición que se inaugurará na sede da Fundación Luís Seoane, na Coruña, o último día do congreso (9 de abril) e que permanecerá aberta ata xullo. Unha retrospectiva "pensada como unha relectura das moitas posíbeis" orientada a dar visibilidade a uns fondos propios, os da Fundación, "realmente complexos", asegurou. Artellada arredor das preocupacións estéticas e intelectuais de Seoane, a exposición guíase en sete bloques: a paisaxe, as ensoñacións, o bestiario, a literatura, trazos e figuras, guerra e capitalismo e autorretratos.


5/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: