Vieiros

Vieiros de meu Perfil


Edición xeral

RSS de Edición xeral
Fuso centroeuropeo

Unha hora máis lonxe do "tempo natural"

A madrugada deste sábado volvemos aplicar o horario de verán, que fai de Galiza o único país de Europa con tal diferenza entre o reloxo e o sol.

Redacción - 09:30 27/03/2010

A noite do sábado 27 ao domingo 28 vólvese mudar a hora para entrar no horario de verán. Deste xeito, os reloxos galegos, os máis adiantados de Europa, desfasaranse 60 minutos máis con respecto ao sol, contrarrestando o suposto aforro enerxético que supón a mudanza, que se aplica dende a crise do petróleo de 1974.

Alén do escaso aforro, da incomodidade do cambio e de ter que padecer unha hora menos de domingo, durante os sete meses que dura o horario de verán, practicamente toda Galiza, agás a faixa máis oriental, ten a dubidosa honra de compartir só coa illa ártica de Jan Mayen un desfase de máis de dúas horas e media entre a hora oficial e a natural, o que fai, que na práctica, sexamos os máis madrugadores -sen sabelo- e onde aparentemente se pon o sol máis tarde, sen ter en conta o "sol de medianoite".

Na práctica, Galiza pódese contar entre os escasos lugares do mundo -se é que hai outro- en que en primavera o sol sae despois das oito da mañá. No inverno o desfase é de "só" máis dunha hora e media, que compartimos tamén co extremo occidental de Islandia, que non ten mudanzas anuais de horario.

Como acontece puntualmente dúas veces ao ano, é o momento de lembrar a tantas veces repetida reivindicación de racionalizar o horario do país e asumir a mesma hora que teñen outros territorios na nosa mesma lonxitude, como Portugal ou Irlanda, que aínda así xa están unha hora por diante da que lles correspondería estritamente.

A adopción do horario centroeuropeo, ou de Berlín, estendeuse ao occidente de Europa a partir da Segunda Guerra Mundial. Ese "horario único europeo" aplicado a un territorio tan extenso só se pode comparar ao que se dá na China, onde todo o país comparte hora. Dese xeito, a situación de Galiza e o seu desfase horario, acrecentado no verán, só é comparábel á que se dá no extremo occidental da rexión autónoma Uigur de Xinjiang,

Na Wikipedia pódense consultar dous mapas que reflicten graficamente a diferenza entre a hora oficial e a solar en Europa, tanto no inverno como no verán, onde Galiza aparece cunha cor rechamante.


4,75/5 (16 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: