Vieiros

“...A Milu pareceulle que algo malo rodeaba
a súa casa. Era moi raro perder as cancións
e perder o bolso e perder o pan.
E mesmo os pais, ás veces perdíanse e non volvían á casa.
Pero ela tiña a Nana. Estaba todo o tempo soa con ela e non a perdería”

Así comeza Milu, a última incursión na literatura infantil da Editorial Kalandra, que colabora coa Fundación Meniños para editar un libro solidario, precisamente cando se celebra, este sábado, o Día da Familia. Trátase dun álbum infantil e solidario escrito por Manuel Rivas, con ilustracións de Aitana Carrasco, un relato tenro e sensíbel que reflicte a indefensión de Milú ante os problemas dos seus pais.

Milú é a voz de moitos nenos e nenas que padecen situacións de desvantaxe social e non poden gozar do seu dereito a vivir en familia. A súa historia lémbranos, tamén, que hai un lugar para a esperanza. Este ‘libro solidario’ doa o 10% das súas vendas á Fundación Meniños, promotora desta edición, para que os nenos e nenas que o precisen poidan ter un futuro mellor.