Segundo un estudo do Grupo de Investigación Social (GIS XXI), o Partido Socialista Unificado de Venezuela (PSUV) gañaría a maioría na Asemblea Nacional cun 36% dos votos a nivel nacional. A oposición obtería o 23,2% dos votos, 7,4% non votaría e 33,4% aínda non decidiu por quen votará.
Entre o último estudo do mes de marzo e este, realizado entre o 4 e o 14 de maio de 2010, o Grupo de Investigación Social afirma que aumentou a diferenza entre o partido gobernante, PSUV, e a oposición do 10,4% ao 12,7%, pasando a intención de voto do PSUV de 32,3% ao 36% e a da oposición do 21,9% ao 23,3%.
Á pergunta sobre quen cre que gañará as eleccións parlamentares, o 38,4% dos venezuelanos contesta que gañará o PSUV, o 18,4% que gañará a oposición e o 43,1% aínda non sabe quen gañará.
Nesta última enquisa de intención de voto, o 26,3% dos venezuelanos defínese como militante ou simpatizante do PSUV (aumenta un 2,2% con respecto ao estudo de marzo, onde tiña o 24,1%), mentres que todo o universo de partidos da oposición ao goberno do presidente Chávez (Acción Democrática, COPEI, UNT, PJ, PV, PODEMOS, MAS) suma o 5,5% (diminúe 0,3% con respecto ao estudo de marzo, onde tiñan un 5,8%).
A enquisa revelou a existencia dun 66,3% de venezuelanos que declara non militar, nin simpatizar por ningún partido nunha sociedade altamente politizada coma a venezuelana.