Vieiros

Coincidindo co plan de axuste introducido polo goberno español, a economía estatal verá freado o seu crecemento no segundo semestre do ano, acumulando dous trimestres de crecemento negativo. Un período de recesión que a Fundación das Caixas de Aforros (FUNCAS) considera que estará vencellado ao axuste fiscal, a caída do investimento público e o descenso do consumo. Deste xeito, e segundo o estudo publicado no último número dos 'Cadernos de Información Económica' desta fundación, o crecemento pechará o ano en cifras do -0,7%. Así e todo, cara a 2011, Funcas prognostica unha taxa do 0,3%.

Doutra banda, Funcas avalía que non se rexistrará unha tendencia cara a creación de emprego no conxunto do Estado Español deica finais de 2011. Deste xeito, a taxa de paro mesmo se incrementaría até o 19,9% en 2010 e chimparía a barreira do 20% en 2011. Mentres, os índices de produtividade medrarían significativamente, un 1,9% en 2010 e 1,2% en 2011 ao tempo que os salarios sufrirían erosión nos próximos dous exercicios. Por outro lado, a previsión de Funcas sobre o déficit público é dun 6,9% en 2011.

Ao tempo, contámoslles da avaliación que o informe de Funcas fai do parámetro de elasticidade fiscal segundo comunidades autónomas. Trátase dun indicador relacionado coa capacidade recadatoria no imposto sobre a renda, o impacto da inflación e a capacidade do imposto para neutralizar desequilibrios económicos. E segundo ese estudo, Galiza aparece a nivel estatal, canda Estremadura, Castela e León e Castela-A Mancha, entre os pechacancelas neste indicador, liderado no Estado por Madrid, Asturias e Cataluña.