Vieiros

“O enésimo exemplo do abandono que sofre o ensino rural por parte do goberno do Partido Popular”, así define a Mesa Galega de Educación no Rural o anuncio de peche de oito comedores escolares. A plataforma, á que pertencen os principais sindicatos e organizacións pedagóxicas do país, subliña que “un dos escasos servizos, como veu sendo o dos comedores escolares, que se foi sostendo a duras penas, está sentenciado á súa desaparición polo feito de levar a extremos as medidas economizadoras precisamente nun sector que veu sendo historicamente desfavorecido”.

Dende a plataforma insisten en que este tipo de servizos son básicos para soster poboación no rural e que a Xunta trata o tema dos comedores públicos “como se dunha empresa se tratase”. Diante disto, a Mesa Galega de Educación no Rural reclámalle á Consellaría de Educación un xiro nas súas políticas.