Vieiros

O viceprimeiro ministro Nick Clegg, foi o encargado de confirmar que o executivo británico do que forma parte levará adiante un referendo sobre o posíbel cambio de sistema electoral no Reino Unido. A reclamación desta modificación do sistema fora unha das principais reivindicacións durante a última campaña da formación liberaldemócrata que lidera Clegg.

Porén, doutra opinión ao respecto é o Partido Conservador, do primeiro ministro David Cameron. Os conservadores aceptaron levar a primeiro plano o debate sobre o cambio de sistema como parte do acordo de goberno asinado cos de Clegg. Mais a formación de Cameron xa anunciou que pedirá o "non" ao cambio nese referendo.

Tal e como está actualmente estruturado, o esquema electoral británico favorece os dous partidos tradicionalmente maioritarios, conservadores e laboristas, minguándolles espazo ás outras formacións e recortando a pluralidade da asemblea británica. Así, cada circunscrición elixe, por maioría simple, un só candidato, quedando sen representación o resto de votos. A reforma en debate introduciría un sistema proporcional, redifinindo os propios marcos das circunscricións e mesmo reducindo o número de deputados da Cámara dos Comúns que pasaría a só 600. Por outro lado, tamén se propón estabelecer lexislaturas fixas de cinco anos.

Recomendámoslles ampliar en:

• The Guardian: O rapaz que soñou un estado perfecto
• The Daily Telegraph: Malas novas para os tories, sexa cal sexa o resultado
• The Independent: Clegg revela as características da reforma