Vieiros

Agosto de 2007

Faculdades e Escolas


A começos do Verao saía a concurso a adjudicaçom de obras nas Faculdades de Ciências da Educaçom, Direito e Química em Compostela e Veterinaria e Análise Alimentar em Lugo.

Todas as operaçons previstas focam-se a remodelar instalaçons e material, e a adquisiçom de novos aparelhos nos dous casos concretos de Lugo.

Este investimento é bastante pobre para as necessidades dos laboratórios da USC, especialmente em Química, onde a ordenaçom dos espaços e as condiçons de trabalho som mui melhoráveis. Noutros casos, como Biologia, a construçom o passado curso dum prédio frente à Faculdade, onde se prevê a instalaçom de empresas privadas como investigadoras parasitárias deste centro, permite à USC deixar os esforços orçamentários em maos alheias.

Repare-se em que o investimento mais custoso espera-se no Pavilhom de Serviços da USC, com 175.000 euros, destinados a reformar o tecto. Paradojos do monumental estado de crise e quebra financeira na gestom da instituiçom, incapaz por isto de enfrentar a competitividade interuniverstária de Bolonha, mesmo entre as três Universidades galegas. Esta é a melhor prova da decadência que o Espaço Europeu de Ensino Superior tem reservada para nós, a "periféria" do capitalismo europeu.

Cámpus


Ainda, a compra de 80 novas computadoras exige o pagamento de 104.000 euros. Semelha que até aquí chega a musculatura económica da USC, pois, por trás das boas intençons a respeito do tráfico, estacionamento para veículos, pedonalizaçom e humanizaçom (sic) dos Cámpus, nom existem mais que meras promessas de estudos.

Queremos sinalar o contraditório de elaborar paralelamente estudos para ampliaçom do estacionamento de automóveis e para a pedonalizaçom. Somamos a isto umha reivindicaçom do estudantado da esquerda independentista neste mesmo terreno: a facilitaçom do transporte viário de bicicletas (mais agora que se encetárom os planos de oferta gratuita para o alunado dum reduzido numero delas).

Pode ser que para a Reitoria e os Concelhos compostelám e lucense seja prometedor tornar a USC num prédio de estacionamento ORA massivo (é de facto utilizado na actualidade por vizinhos e vizinhas da cidade que nom atopam melhor lugar), mas as necessidades do caos circulatório nom podem compensar-se com a inabilitaçom para o uso e desfrute nom contaminante de peons e transporte limpo (bicicletas) que se adequa bastante melhor às exigências circulatórias dentro de e entre Cámpus em Compostela e Lugo.