Vieiros

O novo Decreto do Bacharelato remata a faena iniciada polo Decreto do Ensino Secundario Obrigatorio (ESO). Os nosos adolescentes gozarán de mini-materias para completar os seus estudos de Bacharelato, estudos de deberan preparalos para o acceso á Universidade. Pero non se preocupen, xa que ao parecer, tamén as universidades terán que rebaixar as súas expectativas docentes seguindo o Plan Bolonia que reducirá as ‘licenciaturas’ a ‘diplomaturas’ (3 anos). Só algúns gozarán de programas de especialización e doctorado. Ao resto dos españolitos chegaralles cunha man de pintura universitaria.

Malia as deficiencias que presenta o Ensino Obrigatorio sempre concentramos esforzos nos dous anos do Bacharelato para tratar de suplir estas dificultades antes de que o alumnado abandone o Instituto para acceder á Universidade; pero agora, ao parecer, nin siquera esta etapa educativa vaise salvar.

A Filosofía reducirase a 2 horas semanais e a Educación Física a 1 hora (nin ducharse a gusto).

Saben cal é o nome que recibe unha materia con esta carga lectiva? MARÍA.

¿Saben por que? Porque son esas materias que ninguén prepara e que terminan sendo unha liña no expediente na que ninguén repara nin siquera cando a súa cualificación sexa sobresaliente.
¡Bah! aprobar ‘Filosofía e Cidadanía’ non ten mérito algún!

Os políticos parecen ocupados en case todo menos en romper a cabeza deseñando un ensino de calidade para os futuros cidadáns… ¿e saben por que? Porque cando os cidadáns gozan de espazos para a formación e a reflexión son capaces de pensar por si mesmos… e son autónomos e son libres de tutela allea. E iso aos nosos políticos parece asustarlles!

Cicais teriamos que limitar os programas didácticos a unha lista máis ou menos selecta de vídeos en YouTube e aforrarnos todos os quebradizos de cabeza e o orzamento que gastamos na educación dos fillos. Un pouquichiño de ‘Educación para a Cidadanía’ (aos 13 aniños) moita Historia e Cultura das Relixións para saber de todo un pouco, unha horiña de Ética-Cívica ao finalizar a ESO para cubrir as vergoñas do que chaman ‘educación en valores’ e cando temos a un mozo a piques de alcanzar a maioría de idade xurídica convén reducirlle as horas para pensar: non vaia a ser que as utilice sabiamente e convértase nun cidadán exemplar.

A receita nunca falla: canto máis supercial é a educación inicial dun mozo máis sinxelo será que algúns cidadáns alcancen altos cargos na República…

Platón sabíao de memoria, e denunciaba a demagoxía como a corrupción da democracia ateniense que condenara a morte a un home bo: Sócrates.

Isto é o que nos estamos xogando: unha educación de calidade que permita adquirir nocións de xustiza aos futuros cidadáns.

Cada pau terme da súa driza…!