Vieiros

Hai salarios de cargos políticos nos concellos que son un escándalo, xa que están varias veces por riba dos ingresos medios da clase obreira. O argumento que se utiliza sempre é: que nunha empresa privada gañarían máis. Non é certo, dependería do tamaño, do sector, do lugar, da experiencia. Asemade sobre-entendese cunha persoa que se apresenta a un cargo institucional ten unha actitude solidaria, polo que ademais de facer unha boa xestión e ser creativo debe servir de exemplo en todos os aspectos. Nos últimos anos estes casos son a excepción.

Tampouco é valido o argumento de que, se non se ofrecen estes salarios, os máis preparados foxen pra actividade privada. Amosa unha vision elitista, que nega a capacidade de análise e de ofrecer alternativas daqueles que non teñen formación académica universitaria ou son autodidactas. É unha leria máis, porque despois a maioría dos cargos institucionais teñen unha preparación técnica que pouco ten que ver coa xestión dun concello, e a practica reflicte que moitas veces unha total incapacidade pra dar respostas axeitadas aos atrancos e eivas existentes. Non esquezamos asemade que os concellos teñen persoal técnico e se fora necesario poden contratar a especialistas ou facerse asesorar por eles, e os cargos institucionais son elixidos para tarefas políticas.

Os salarios de alcaldes ou alcaldesas, de concelleiros e concelleiras, convertéronse ademais en moeda de troque e presión política; como acontece nos municipios de Porriño e Gondomar, onde o PSOE apoiou ao BNG pra alcaldía, non hai pactos de governo, e agora veta liberacións e salarios, atrancando a direción cotiá do concello. Premendo co desgoverno pra conseguir un acordo que lle favoreza. Son xeitos de proceder negativos, onde todo vale, que afastan á povoación da política.

Esta situación non se pode manter, hai que rematar coa lei da selva, e garantir que os cargos eleitos podan realizar a xestión cotiá. Cumpre asemade que o número de liberacións, salarios e medios económicos dos cargos institucionais se axusten a uns criterios homologábeis, a uns mínimos e uns máximos dentro dos que se teñen de desenvolver. Autonomía municipal si, porén facer dela unha feira non. Este é un tema político importante porque atinxe á democracia e á participación.