Vieiros

O escrito fai un contributo para rachar o pano da impunidade que hai máis de sete decenios impera no Estado. Tiveron que transcorrer setenta e dous anos do golpe militar e xa trinta e tres anos da morte do ditador para que a xustiza, alomenos un xuíz, lle abra un proceso ao franquismo, á guerra de exterminio emprendida polos capitalistas e militares sublevados contra o pobo da fronte popular de febreiro, do Estatuto de xuño do 36. As definicións que se dan na legalidade internacional autorizan a empregar o termo xenocidio e, xa que logo, a non aceptar argucias legais para desatender o burato negro da nosa historia contemporánea. Incluso o código penal da República autoriza a persecución e esclarecemento dos crimes provocados pola represión do golpe militar.

A declaración de competencia do órgano xudicial vai permitir arrancar a investigación sobre as 114.266 detencións ilegais denunciadas, listaxe que aínda ampliarase segundo avancen as investigacións ao longo do Estado. Cada vida perdida, extraviada na barbarie da represión supón unha man chea de bágoas e de ilusións rotas. A suma de vidas e arelas que terían construído unha Galiza sen Atilas e unha República do pobo da fronte popular.

Os traballos trala aprobación dunha insuficiente lei recoñecedora de medidas a prol dos que padeceron persecución e violencia durante a guerra e a ditadura semellan aínda moi notables: a xerarquía da igrexa católica aínda non respondeu á petición do xuíz para que lle entregue informacións sobre os asasinados dos que hai constancia nos arquivos  eclesiais; as administracións públicas teñen que pór recursos, planificación  e determinación para investigar e honrar aos mortos; o Goberno do Estado ten que rectificar e  darlle instrucións á fiscalía  para non  recorrer  e evitar caer na infamia de aceptar outra ronda de silencio. E resta acadar a anulación dos xuízos políticos baixo o franquismo, cuestión chave da ilexitimidade do réxime franquista. Traballo abondo para restaurar a memoria de dignidade dos loitadores e loitadoras pola liberdade republicana.