Vieiros

"Se ben todo o mundo, ou case, preséntase como defensor dos dereitos humanos, á vista dos silenzos e as prácticas duns e doutros, cabe preguntarse quen ten agora a autoridade moral requirida para encarnar unha defensa sen complacencia destas liberdades", sinalan desde Reporteiros sen Fronteiras, RSF.

O último informe elaborado por este colectivo internacional bota man de exemplos concretos coma o asasinato en Rusia da xornalista Anna Politkovskaya, a intolerancia contra toda crítica do goberno de Tunicia ou os ataques ás delegacións diplomáticas de Dinamarca despois da publicación das viñetas humorísticas sobre Mafomede. Segundo RSF, fronte a todos estes casos a Unión Europea non fixo esforzo ningún malia que os seus propios acordos de cooperación estean teoricamente condicionados ao respecto das liberdades. De xeito especial, quéixanse de que o Europarlamento evitase sumarse á petición dunha comisión de investigación internacional sobre a morte de Politkovskaya, "a xornalista número 21 á que asasinan en Rusia desde a chegada ao poder de Vladimir Putin".

Ditaduras web 2.0
Neste momento hai sesenta persoas en todo o mundo en prisión por publicar en internet informacións críticas cos seus respectivos gobernos. RSF fíxase principalmente no caso de China, país ao que acusa de investir amplos recursos en perfeccionar non só a censura senón tamén a persecución de disidentes a través da rede. Á beira cita outros países como Vietnam, Siria, Tunicia, Libia e Irán. A acusación esténdense tamén aos xigantes informáticos, dos que denuncian que colaboren nesas tarefas censoras.

Con todo, a asociación é optimista ao respecto de que poida haber cambios a medio prazo en China e de que a celebración dos Xogos Olímpicos en 2008 contribúa a que afrouxe a represión. De calquera xeito, RSF cualifica de "beizón" a oportunidade do uso da web por parte dos colectivos que defenden os dereitos civís, facilitando a circulación das informacións "subversivas" e "contrarrevolucionarias". Así e todo, láianse, "tamén os ditadores entraron na era do 2.0".

O caso Egunkaria
No contorno estatal, o informe de RSF cita o caso do xornal vasco Egunkaria, lembrando que a propia Fiscalía recoñeceu que o proceso contra a publicación se lanzou sen existiren probas contra el e que en ningún caso se demostrou que tivese vencello coa ETA.

Tamén se avalía criticamente a lei audiovisual aprobada polo Parlamento catalán, as ameazas da ETA a xornalistas e o proceso contra Tayssir Allouni, reporteiro do canal Al-Iasira acusado de colaborar con Al Qaeda malia que as súas presuntas relacións con esa rede non inclúen moito máis que entrevistas a algúns dos seus membros, incluído o seu líder, Osama Ben Laden.