Vieiros

O 27 de setembro de 1975 morrían fusilados na alborada os membros da Fronte Revolucionaria Antifascista Patriótica (FRAP) Xosé Humberto Baena, José Luís Sánchez Bravo e Ramón Sanz e os militantes de ETA, Ángel Otaegi e Jon Paredes Manot, Txiqui. Foron os últimos fusilamentos do agonizante réxime do xeneral Franco. Non abondaron os centos de manifestacións que se produciron en todo o estado, as protestas en toda Europa e mesmo a intercesión do Papa Paulo VI para mudar o signo dunha sentenza emitida en consellos de guerra sen as mínimas garantías xudiciais. 30 anos despois, a familia do vigués Xosé Humberto Baena seguen empeñados en que se revise o xuízo e probar a súa inocencia cun recurso no Tribunal de Estrasburgo. Como todos os anos, Xosé Humberto Baena será lembrado polos seus amigos e familiares no cemiterio vigués de Pereiró.