Vieiros

"As obras de Fomento en Galiza non poden facerse sen coordinación nen diálogo coa Xunta, e aquí é onde debe actuar Touriño se realmente quere exercer como presidente", declarara Francisco Rodríguez o pasado venres logo da presentación dunha proposta non de lei no Congreso para a coordinación dos investimentos estatais en infraestruturas. Rodríguez criticou que Touriño non lle adicase atención abondo "aos atrasos na alta velocidade a Galiza" e pedira atención económica para os treitos aínda non iniciados do Eixo Atlántico, solicitando entre outros, que un ramal do tren se desviase deica ao aeroporto de Lavacolla, "unha obra que non implica máis de 5 km".

Ás declaracións de Rodríguez respondeu con belixerancia o presidente da Xunta, quen nun acto do PSdeG dixo que as declaracións do deputado nacionalista tiñan que ver co seu "ánimo de ocupar espazo mediático cada día". "Alguén se está poñendo nervioso e non é no noso partido", afirmou. A continuación, Touriño chamou a "facer política a través do diálogo e a cohesión co apoio dos cidadáns ás grandes cidadáns", subliñando ue "ese é o noso camiño e non necesitamos queimar bandeiras no pasado nin envolvernos na de Galiza agora", en velada ininuación a cando o deputado do BNG fora xulgado hai anos pola queima dunha bandeira española.

Sobre o asunto, o vicepresidente da Xunta e voceiro nacional do BNG comentou que esas declaracións non lle gustaran "nin no fondo nin na forma" e pediulle a Touriño "saber encaixar as críticas, que sempre son boas e axudan a traballar mellor". "A sociedade agarda que nós esteamos por riba de determinadas cousas sen entrar nalgúns tirapuxas normais en política", dixo Anxo Quintana, "e recoñezo que eu tamén cometín ese erro nalgunha ocasión".