Vieiros

Vieiros de meu Perfil


Edición xeral

RSS de Edición xeral
O QUE DIN OS INTERNAUTAS GALEGOS FRONTE Á VAGA DE INCENDIOS

Fíos, vento, árbores e cinzas, no blogmillo

"Non pode ser que os terreos que quedan en desuso se planten de eucaliptos ou piñeiros como única alternativa a que se enchan de silveiras", din no miccionario. "Nube negra destrúe floresta, patrimonio, liberdade dos cabalos, soños… Aprovéitase da aldea primitiva, esnaquizada polo autoodio, que non aprendeu a manexar o lume", contan na Rúa do Sol. "Non me veñan co contexto. O de que o monte arde porque non ten valor, porque xa non se vive del, porque non se limpa. Eso explica por que arde, pero non por que lle prenden lume", desafían en Si home si. Achegámoslles unha nova escolma do que se debate nos weblogs sobre a vaga de incendios.

- 16:32 14/08/2006
Tags:

  • "Non, eu tampouco sei o porqué desta saña incendiaria. E non é porque non me preocupe, nin porque non pase dous tercios do día facendo preguntas ou zafando de dar respostas sobre o asunto. E tamén, como a vostedes, me doe, por moito que debería ter o distanciamento que hai que ter sobre calquera materia profesional. Aféctame, e sigo sen entendelo", láiase Xosé Manuel Pereiro en Si home si

  • "É o territorio o que nos amosa, nidiamente, outra faciana chave da perda de identidade colectiva", reflexiona Nygard en A propósito do lume

  • "O binomio prevención-extinción é insuficiente, necesitamos dunha triade para ser realmente eficaces: prevención-extinción-investigación policial. A Xunta de Galicia e mesmo o Estado adoecen actualmente de capacidade punitiva para a persecución da criminalidade que convoca esta ondada de incendios. A impunidade favorece a reiteración criminosa e o dano multiplicado", escribe Ian en De Paso

  • "Avergóñome dalgúns paisáns nosos que son os causantes desta desfeita, por mor de intereses económicos (inmobiliarios, sobre todo), vingativos, ignorancia ou quén sabe qué. E pola contra síntome orgulloso de todos eses voluntarios que se están xogando a vida para que este pesadelo remate", escribe Tichborne en Chove en ningures

  • "Nube negra destrúe floresta, patrimonio, liberdade dos cabalos, soños… Aprovéitase da aldea primitiva, esnaquizada polo autoodio, que non aprendeu a manexar o lume. Precisamos borrasca atlántica que devolva aire transparente con olor verde", así o describen en "Conxuro", na Rúa do Sol

  • "Num alarde de ignorância e de intoxicação mediática, o diário que dirige Pedro J. Ramírez assegurava que as actuações do executivo galego estiveram guiadas pola discriminación lingüística y el sectarismo", quéixase Gerardo Uz no artigo "De lumes e de língua ou de como misturar alhos com bugalhos", no Portal Galego da Língua. "Na situaçom actual de conculcaçom dos direitos lingüísticos, no ensino, as administrações públicas, os serviços sociais e outros ámbitos onde qualquer de nós pode exigir o emprego da nossa língua, o grau de protesto é realmente ínfimo", opina sobre o mesmo JMOuteiro en O Reverso

  • "A revolución agrícola en Galiza foi tardía, abrupta e inacabada", lembra senalcume unha das mellores clases ás que asistiu na universidade, na busca de claves sobre a vaga de incendios

  • "O que cada vez teño mais claro é que aparte de intencionados (creo que todos de acordo) este ano os lumes teñen alguén movendo fios por detrás... quén?", pregúntase o internauta de Diario dun Suevo

  • "As cinzas que o vento trae póusanse acarón dos libros que arden nas páxinas que leo. A realidade mancha a ficción, o cadáver do monte viste de loito a literatura", di O levantador de minas

  • Hai que paralos, escribe Choiva ázeda

  • "Nada me impactou máis como a historia dunha pequena aldea de Ponte Caldelas, onde as mulleres (todas elas viúvas) salvaron coas súas mans e con parte da súa alma as casas da queima", relata a autora de O que queda do naufraxio

  • "Tres días de lume na costa da morte. caos, incomunicación e morte", di mariademallou en Casatlántica

  • "Non pode ser que apagar o lume sexa un gran negocio. Así sempre haberá quen queime", quéixase Caravelete no miccionario

  • En Arde Galiza, pasatempo incendiario: procura as diferencias

  • "Galiza está de loito, e non só os seus montes. Cun fin, a veces penso que é o único fin de todo comportamento humano, desprezouse a natureza, atentouse contra ela e destruíronse centos de exemplares para que uns cantos teñan un pouco máis de celulosa (que paradoxo!) de colorinchos. Morreron fauna e flora para que uns cantos aumentaran un pouco máis as súas fortunas desafortunadas", así o di David_holm, no Recanto Silente

  • 0/5 (0 votos)