Vieiros

O gabinete do Goberno Aznar non informou aos medios de comunicación da súa visita a Galicia ata as once da noite do venres 13. Todo era clandestinidade nos preparativos: ningunha referencia nas previsións do presidente español nin do galego, que informaba o día anterior que Fraga ía estar nunha degustación de mexillóns en Santiago.

Pero a noticia correu coma o lume e xuntáronse diante da Torre de Control preto de un milleiro de manifestantes dispostos a apupar a chegada do xefe do Executivo estatal. Alí estaban activistas de Greenpeace, militantes de BNG e CIG e tamén membros da plataforma Nunca Máis.

Producíronse diversos enfrontamentos coa Policía, que zarandeou e ameazou a un xornalista de La Voz, Rubén Ventureira, e ao escritor Manuel Rivas. Os manifestantes chegaron a estar a uns 500 metros da Torre de Control Marítimo e mentres Aznar daba a rolda de prensa, varios axentes da Policía mallaron nun mozo repetidamente, producíndolle leves contusións. Tamén foi detido un mozo e trasladado ao cuartel de Lonzas, para ser ceibado horas máis tarde.

O momento emotivo da xornada produciuse cando unha muller se achegou á muralla de antidisturbios a poñerlles un lazo negro na solapa. Varios dos axentes aceptaron a proposta, aínda que o puxeron por dentro do uniforme. Un deles, comentou: "Señora, eu isto só o podo levar interiormente". E estouparon os aplausos dos manifestantes que un minuto antes berraban: "Menos maderos, más chubasqueros".

A concentración, tan precipitada como a visita do presidente, rematou logo de ver pasar (dirección Madrid) aos vehículos con cristais tintados fuxindo da xente. Berrar "Televisión, manipulación!", "Demisión!", "In-com-pe-ten-cia!"... era o único que lles quedaba. Nin sequera chegaron a ver ao home do bigote... "que limpe o chapapote!".

[Mentres, na Torre de Control Aznar dicía isto]