Vieiros

O Liet é orixinariamente un festival da canción frisoa, que é unha lingua que se fala nas zonas fronteirizas entre os Países Baixos e Alemaña. Como continuación deste xa veterano certame, que se organiza na cidade de Ljouwert, ampliouse en 2002 para convertelo nunha eurovisión das linguas minorizadas europeas. Esa primeira edición foi gañada polos cataláns Pomada e non contou con participación galega. En 2003 levou a voz galega Anubía, e en 2004 a mosense Uxía que obtivo a terceira praza.

Neste 2005 non haberá edición internacional, pero si frisoa. Será unha pausa para repensar o modelo e buscar o financiamento do novo Liet Ynternasjionaal. Nel están implicados polo momento a Fundación Liet de Frisia (quen ata de agora sumira todo) e mais a Sweblul sueca, pero cómpren cando menos a intervención de dous estados europeos máis para que o proxecto poida ter carácter europeo e procurar diñeiro da Comisión Europea.

E como vai ser? Pois para empezar, organizarán a fase final os samis de Suecia, gañadores nas dúas últimas edicións. E co obxectivo de implicar máis minorías e máis intérpretes, moi probabelmente haberá tres semifinais, unha nororiental, outra meridional e outra central, con sedes locais. E Galiza, quen sabe, podería ser unha delas.