Vieiros

A de Menáncaro é, a día de hoxe, unha das derradeiras fragas existentes en Ferrol, xunto coas situadas na Graña, Leixa e Covas. Nesta área, que presenta unha grande biodiversidade, existen varios carballos centenarios que carecen de ningún tipo de protección legal. Así, está prevista a construción na zona dunha nova urbanización residencial, con 70 vivendas acaroadas.

Por este motivo, unha plataforma cidadá está a promover diversas actuacións destinadas a informar da perda que suporía a destrución da fraga. O colectivo conta co apoio de diversas entidades ecoloxistas e culturais, entre as que figuran Adega, SGHN, Os Picos do Sol ou Artábria.

As mobilizacións darán comezo o día 23 de decembro, cun pasarrúas festivo a partir das 18:30 horas no Cantón de Molíns. O mesmo emprazamento acollerá o 4 de xaneiro un obradoiro didáctico. Por último, os días 8 e 22 de xaneiro desenvolveranse senllos roteiros pola fraga de Menáncaro, a partir das 11:00 horas. Nestas saídas desenvolveranse diversas actividades, como a procura de rastros pola fraga, contacontos, ou a charla Quen quere Mencáncaro urbanizado.

As persoas interesadas en participar neste programa poden obter máis información no propio blog da plataforma que o promove.