Vieiros

Os zapatistas din que esta marcha de 2006 supón a terceira fase da súa revolución. Nunha declaración recente din que "Só é posíbel un paso adiante na loita se nos unimos con outros axentes da sociedade", como "xornaleiros, mestres, estudantes e todos os traballadores da cidade e do campo". Tampouco queren participar de maneira oficial no proceso electoral, que consideran corrupto e afastado da xente. Por iso, para o pobo mexicano e outras asociacións pacifistas "non está claro que tipo de movemento vai ser agora o EZLN".

O certo é que non faltan as voces que volven acusar a Marcos de argallar un "circo", e mesmo algúns especulan que o obxectivo persoal de Marcos podería ser empregar a marcha zapatista para abandonar a súa vida de agochamento, tal vez facéndolle caso á chiscadela que lle mandou o presidente Vicente Fox lanzando a idea de concederlle o perdón ao Subcomandante. Pode que un paso neste adeus ao anonimato sexa a creación dun blog para seguir a marcha, no que o Delegado Zero se dirixe á poboación e aos medios de comunicación de maneira bastante informal.